Naturoppsyn i Geiranger-Herdalen landskapsvernområde.
Naturoppsyn Kjell Hansen er tilknytta Nasjonalparkseksjon sør og har tilsyn med Geiranger-Herdalen landskapsvernområde og nærliggande verneområder.
SNO Geiranger har oppsyn i landskapsvernområdet Geiranger-Herdalen med tilgrensande naturreservat og landskapsvernområde i kommunane Stranda og Norddal. Geirangerfjordområdet og Nærøyfjordområdet står på UNESCO si liste som naturarv (Vestnorsk fjordlandskap), og i geofagleg samanheng er områda unike døme på fjordlandskap med eineståande naturkvalitetar.
SNO Geiranger har som oppgåve å drive naturoppsyn med heimel i lov om statleg naturoppsyn innafor sitt oppsynsområde. Føremålet er å ivareta nasjonale miljøverdiar og førebygge miljøkriminalitet. Meir konkret medfører dette kontroll med reglane gitt i medhald av Friluftslova, Naturvernlova, Motorferdselslova, Kulturminnelova, Viltlova, Laks og innlandsfisklova og delar av Forureiningslova. Oppsynet driv og med rettleiing og informasjon, samstundes som det kan drive med skjøtsels-, registrerings- og dokumentasjonsarbeid.
Andre viktige arbeidsoppgåver er lakseoppsyn og tilretteleggingstiltak i verneområda.
